GABAY: Gabaygan la yiraa “Tabbeellaha waxaa noogu qoran ” waxaan tiriyay markii ay dillaaceen toowradihii Carabta, anoo xaalka dalka isha ku haya, wuxuuna leeyahay:
Ka tuureen Siyaad nimanki riday toban jirkeeygiiye
Taaym waxaan garaadsaday fitnada tolowdu yeertaaye
Talis dowlo loo wada dhanyoo taagan maan arage
Taariiqda qoran baa dhacdada laga tixraacaaye
Waxaan taminayaa oon rabaa tamashle dowleede
Iyo calan inoo taaganoo laga tumaayaaaye
Toowradaha markaan sii arkiyo teenna kala taalla
Sida cunugeey tagtay hooyadiis toban asoon gaarin
Qalbigaa dalkii tabahayaa taam i noqoneeyne
Tawna waan ka soo oran hurdada toban kunoo jeere
Tiisa kaan aqoon bey qalqiga tixagaleeyneyne
Inagana tabtaas baan nahoo nala takooraaye
Tabeellaha waxaa noogu qoran tuugo nacaseede
Ka Tasbiixsay uunkoo ka yaab teybka aan nahaye
Tirmay magaci Soomaalidii taaganaan jiraye
Tuurmay calanki waa kaas marnaba toosis loo garane
Tafaraaruq waa kaas shacbigi kala tahriibeene
Tabar beeshay lacagtoo ka haray tumin kun goyneeyne
Taako ma leh dhulkii ey samaan nabaddu taallaaye
Toowriyo haddeey taagan tahay talo kacaaneede
War miyaan loo turin shacbiga turunturroonaaya
Tabta nolosha soomaalidaa tuban sancoon joogo
Taariiq haddii aan ka qoro Yamanna taabtaabto
Tusmo naagaheennii jeclaa tamashle noolaanta
Talo kuma hayaan iyo wanaag tacab la sheegaaye
Musqulaheey tiraan iyo gidaar tafashinaayaaye
Turturqeeno farahoo dhammaan tahar dillaacmeene
Tabar baa u geeysaye ma rabin talaxun booyaase
Nimankiina camal loo tirshaa ugama toosaane
Qaar gawaari loo tarabin bey tiratiraayaane
Taagis buu ijaar guri rabaa Carab tacaalaaye
Korontaana taa dheer biyaha tasadudkoodiiye
Iyo maradh tageeyn oo ilmaha tifatifeeyaaye
Taakooleey waxaa lala dhacaa toban garruumoode
Teybal yuu’en daawadi baryahan toos ma bixiyeene
Bukaankiina tacab beey marshaan toban wareegoode
Intuu tiira dheer noqanayuu talaf yiraahdaaye
Markuu tanag sidii yeero bey tasarufeeyaane
Daawo taya lahaoo wax u tartaa kuma tallaalaane
Benisiliin la tuuroo shushubaa la isu taagaaye
Cataq tiro dadkeennaas ku nool toban kun dhaaftaaye
Tawac bey ku wada nool yihiin tuugsi loo kaca’e
Waa cammoow i sii toban Riyaal tamanahoodiiye
Iyo tuugo xadistoo ilmaha lagu tashjiicaaye
Toowriyo haddeey taagan tahay talo kacaaneede
War miyaanan loo turin shacbiga tiiha wada gaaray
Tuugsiga miyaan naagahaa laga taxaabeeynin?
Iyo taa mid dheeroon jecleeyn inan ku taaqtaaqo
Haddey adiga kuu toosantoo Toronto aad joogto
Kaksisna aad ku nooshahay Iswiid Yurub tanaadeysan
Tiifiiga waa laga arkaa taxanaheeygaane
Talo keen walaaloow dalkii wuu ku tabayaaye
Tooseen haddeer Carabahoo dhaliyeene
Caabidiin ka tuureen shcbigi Tuunisoo kacaye
Tagay oo Xusniba weysagaa sii tilaabsadaye
Waxba hadalka yuu ila tagine waxaan ku taakeeyay
Soomaalaay inteys tiirsadaan toosa oo kaca’e
Taageera waligiin midkiin taagdarnaan galo’e
Dhammaad.
Saciid Muuse Axmad
abwaanyare2013@hotmail.com
Isha Ku Hay Allgalgaduud Media
allgalgaduud@gmail.com
