Muqdisho (AGGM): Wakiilka gaarka ah ee Midowga Afrika u qaabilsan Soomaaliya Mohamat Saleh Annadif ayaa raalligelin ka bixisay nin rayid ahaa oo maanta ku dhintay waddada Maka Al-Mukarrama ee magaalada Muqdisho kaddib markii uu jiiray gaari ay leeyihiin ciidamada AMISOM.
Danjire Mohamat Saleh Annadif wuxuu sheegay in ay aad uga xun yihiin shilka gaari, isla markaana ay la qeybsanayaan murugada qoyska uu ka geeriyooday marxuumka.
Wakiilka wuxuu tilmaamay in AMISOM ay kala shaqeyn doonto booliska Soomaaliya baaritaanka sida uu falka u dhacay.
Warkan ka soo baxay AMISOM ayaa ka dambeeyay kaddib markii maanta ay wasaaradda arrimaha gudaha ee xukuumadda Soomaaliya sheegtay in ay ka xun tahay geerida muwaadinka Soomaaliyeed oo uu dilay gaari ay leeyihiin ciidamada AMISOM.
Wasiirka arrimaha gudaha Cabdullaahi Goodax Barre ayaa ka codsaday ciidamada nabad ilaalinta AMISOM inay xaqiijiyaan qaddarinta ay mudan yihiin dadka Soomaaliyeed.
Isha Ku Hay Allgalgaduud Media
allgalgaduud@gmail.com
