Ciidamada Militariga Soomaaliya ayaa waxa ay Howlgallo ka dhan ah Shabaab ay ka fuliyeen Degmada Baardheere iyo Tuulooyin hoostaga.
Ciidamada dowladda Soomaaliya oo garab ka helaya kuwa Jubbalan ayaa howlgalkan waxa ay ku beegsanayeen xubno ka tirsan Shabaab oo mararka qaar si dhuumaaleysa ah ku yimaada degmada Baardheere iyo Tuulooyin hoos yimaada.
Abaanduulaha ciidanka Militariga Soomaaliya ee qeybta gobolka Gedo Korneel Cismaan Cabdi Qorax oo warbaahinta la hadlay ayaa sheegay in howlgalkan uu yahay mid Al-shabaab looga saarayo deegaanada iyo Tuulooyinka ay kaga sugan yihiin gobolka Gedo.
Waxa uu sheegay in howlgaladan ay iska kaashanayaan ciidamada dowladda iyo kuwa Jubbaland ay yihiin kuwo sii soconaya ilaa Al-shabaab looga saarayo guud ahaan gobolka Gedo.
Cidamada dowladda ayaa mudooyinkii u dambeeyay waxa ay dhaq dhaqaaqyo ciidan ay ka wadeen deegaanada iyo Tuulooyinka hoos yimaada gobolka Gedo, kuwaas oo ay ku sheegeen in ujeedkooda uu yahay sidii Shabaab looga saari lahaa gobolka Gedo.
