Wasiirka gaashaandhigga ee dowladda federaalka ah ee Soomaaliya, Cabdulqaadir Sheekh Cali Diini ayaa magaalada Muqdisho ku qaabbilay wafdi ka socday dowladda Jarmalka oo uu hoggaaminayay, wakiilka wasaaradda arrimaha dibadda ee Jarmalka u qaabbilsan arrimaha Afrika.
Wasiirka iyo wafdiga ayaa ka wada hadlay, sidii loo xoojin lahaa xiriirka iyo iskaashiga labada dowladood, gaar ahaanna taageerada dowladda Jarmalku ay siiso Xoogga dalka Soomaaliya.
Labada dhinac ayaa isku af-gartay arrimaha ay uga wada hadleen kulanka ee ay ku yeesheen magaalada Muqdisho.
Ugu dambayn-na, wasiirka gaashaandhigga ee dowladda federaalka ah ee Soomaaliya ayaa u mahad celiyay dowladda Jarmalka oo uu sheegay, inay gacan ka geysato dib u dhiska iyo tayaynta ciidammada Soomaaliya.
Dowladda Jarmalku waxay ka mid tahay, dowladaha xiriirka wanaagsan la leh dowladda federaalka ah ee Soomaaliya, waxayna gacan ka geysataa horumarinta siyaasadda, amniga iyo ciidammada qalabka sida ee Soomaaliya.
