Inkastoo orodyahanada Soomaaliya Maryan Nuux Muuse ay kaalinta ugu danbeysa ka soo gashay tartankii orodka 400 mitir ee hablaha Olimbikada Dunida hadana waxa ay dhiirogelin ka heshay Soomaali iyo dadyow kale oo badan.
Wargeyska caanka ah ee ka soo baxda dalka Mareykanka ee Washington Post ayaa warbixin ay ka qortay orodyahanada Soomaliya waxa ay cinwaan ugaga dhigeen: “Orodyahanad Olimbikada ah oo ku dhameysatay in ka hooseysa inta ay ku dhameystaan gabdhaha dugsiyada sarre balse waxa ay weli tahay dhiirigelin.”
Warbixinta Washington Post ayaa sidoo kale lagu yiri: “Orodyanada caalamiga ah ma ahan inay amaan ku helaan kaliya dadaalkooda. Laakiin orodyahanada Somalia Maryan Nuh Muuse waa in texgelin gaar ah la siiyo.”
Washington Post ayaa soo qaadatay in Maryan aysan helin tababar ku filan islamarkaana ay si geesinimo leh u matashay dalkeeda inkastoo ay dhibtooyin ka jiraan Soomaaliya. Waxa ay kaloo soo qateen in xitaa garoonkii ay tababarka ku qaadatay inuusan laheyn agabka tababar ee loo baahan yahay, taas bedelkeedana in ciyaartoyda Mareykanka ay helaan tababar dhameystiran maalmaha ugu horeeya ee dugsiyadooda.
Maryan Muuse ayaana amaan badan iyo mahadcelin ka heshay dadka Soomaliyeed iy weliba dadyow kale, iyagoo ku amaanay sida ay dhiirgelin ugu sameysay dad badan oo sideeda oo kale ah oo ka soo baxay xaalad adag islamarkaana soo istaagay masraxa ugu weyn ee Olimbikada Adduunka, waxaa sidoo kale jiray dad badan oo iyana dhaliil usoo jeedinayay kana xumaa guul daradeeda.
