Muqdisho (AGGM): Warar hoose oo aan ka helnay Xarunta Madaxtooyada Soomaaliya ayaa sheegaya in Madaxweynaha Soomaaliya uu beel beel ugu yeerayo Xildhibanada Baarlamaanka Soomaaliya, isagoo ka codsanaya in ay ku taageeraan maalinta Baarlamaanka la horgeeyo RW cusub in ay codka Kalsoonida ah siiyaan.
Sargaal ka tirsan Madaxtooyada Soomaaliya ayaa u xaqiijiyay Warbaahinta Allgalgaduud media in madaxweynaha Soomaaliya uu si qarsoodi ah ugu yeerayo xildhibaanada Baarlamaanka Soomaaliya.
48 Saac ee ugu dambeeysay ayuu Madaxweynaha Soomaaliya la kulmay xildhibaano u badan Beesha Hawiye, waxaana xildhibaanada uu u sameeyay balan qaadyo u badan Xilal.
Xildhibanada Beesha Habar Gidir ayuu Madaxweynaha Soomaaliya ku qanciyay in la siin doona Xukuumada cusub Wasiirka Amniga, isagoo ka codsaday in ay ansixiyaan Ra’iisul Wasaaraha Cusub.
Beesha Abgaal iyo Beelaha abgaal la dhashay ayuu xasan Sheekh iyana la kulmay iyo Nabadoonada Beesha Mudulood, waxaana uu ka dalbaday in ay codka siiyaan si shuruur la’aan ah Ra’iisul Wasaaraha Cusub, waxaana balan qaadyo uu ugu sameyay in Safiiro iyo Xilal hoose oo muhiim ah in beesha ay heli doonto.
Beesha Murusade ayaa iyana xildhibaanadeeda iyo Nabadoonadooda oo uu la kulmay Xasan Sheekh waxaa uu ka dalbaday in codkooda ay xildhibaanadu u siiyaan RW Cusub, isagoo u balan qaaday in Wasiir uu ka siin doono Xukuumada cusub, waxaana uu ku qanciyay Wasiirka wasaarada Warfaafinta.
Sidoo kale Madaxweynaha ayaa kulamo hoosaad la yeeshay Xildhibanada beelaha Digil iyo mirifle, waxaanan warar aan helnay ay sheegayaan in ay isku fahmi waayeen arin siyasadeed oo ay kamid aheyd arinta mamul u sameynta Gobolada Bay iyo Bakool.
Sidoo kale Madaxweynaha Soomaaliya ayaa isbuucaan waxaa uu isku dayayaa in uu kulamo la yeesho xildhibaanada beelaha Majeerteen , Mareexaan, Ogaadeen iyo Isaaq, kuwaasi oo ay ugu badan yihiin xildhibaano wada qorshe ay codka ugu diidayaan Ra’iisul Wasaaraha Cusub ee Xasan Sheekh ay isku group ka yihiin oo ka tirsan Kooxda Damjadiid.
Isha Ku Hay Allgalgaduud Media
allgalgaduud@gmail.com
