Ku Simaha Madaxweynaha Jamhuuriyadda ahna Gudoomiyaha Golaha Shacabka Mudane Maxamed Sheekh Cusmaan Jawaari ayaa xalay ka qeybgalay kulan casho sharaf ah oo loogu tacsiyadeynayey Allaha u naxariistee Marxuum Shariif Saalax Maxamed oo dhowaan ku geeriyooday magaalada Muqdisho.
Kulankan oo lagu qabtay xarunta Villa Hargeysa ayaa waxaa kasoo qeybgalay sidoo kale Ku simaha Ra’isulwasaaraha ahna Ra’isulwasaare ku xigeen,Wasiirro,Xildhibaanno, qoyska Marxuumka, aqoonyahanno saaxiibo dhow ay aheen marxuumka amaba lasoo shaqeeyey iyo marti sharaf kale.
Ugu horeyn kulanka waxaa taariikhda marxuum Shariif Saalax Maxamed ka akhriyey Cabdi Xaaji Goobdoon,Xuseen Sheekh Axmed Kadare, Jaamac Maxamed Qaalib iyo Gudoomiyaha Jaamacadda Umadda Soomaaliyeed Mudane Maxamed Axmed Jimcaale waxaana ay dhammaantood hoosta ka wada xariiqeen kaalintii uu Allaha u naxariistee Marxuum Shariif Saalax ku lahaa hirgelinta Af-Soomaaliga iyo tacliinta Dalkeenna.
Shariif Maxamed C/laahi oo ka mid ah qoyska Marxuumka uu ka geeriyooday ayaa uga mahad celiyey Dowladda Federaalka Soomaaliya iyo Umadda Soomaaliyeed guud ahaanba sida ay u maamuuseen Allaha u naxariistee Marxuum Shariif Saalax Maxamed Cali iyo sida loo muujiyey kaalinta uu shacbiga Soomaaliyeed uga jiro.
Ku simaha Ra’isulwasaaraha Dalka ahna Ra’isulwasaare ku xigeen iyo Wasiirka Wasaaradda Awqaafta Mudane Ridwaan Xirsi Maxamed oo isaguna hadal kooban ka jeediyey kulankan tacsida ah ayaa magaca Xukuumadda ugu tacsiyadeeyey Allaha u naxariistee Marxuum Shariif Saalax Maxamed Cali.
Ugu dambeyntii Ku simaha Madaxweynaha Jamhuuriyadda ahna Gudoomiyaha Baarlamaanka Federaalka Soomaaliya Mudane Maxamed Sheekh Cusmaan Jawaari oo kulankan Tacsida ah soo xeray ayaa ka hadlay taariikhda iyo waxqabadkii Marxuum Shariif Saalax Maxamed waxaana uu markaa kadib marxuumka Alle uga baryey inuu naxariistiisa jano siiyo,qoyskiisa iyo guud ahaan Umadda Soomaaliyeedna samir iyo iimaan ka siiyo.
—DHAMAAD—
Xafiiska Warfaafinta iyo Xiriirka Dadweynaha Ee Gudoomiyaha Baarlamaanka
Media & Public Relation Office Of Speaker
Email:- Media@parliament.gov.so
