Qaar ka mid ah dadkii ka barakacay dagaallada ku soo noq-noqday magaalada Gaalkacyo ayaa go’aansaday in ay ku noolaadaan xero ay ka samaysteen degaanka Calmadow ee duleedka magaaladaasi.
Qoysaskaasi ayaa ahaa barakacayaal ku nool xerada Al-Aamin, waxaana dhowr jeer ku kor dagaallamay xooggaga Puntland iyo Galmudug ee isku haya magaaladaasi.
Dadkaasi oo la hadlay BBC-da ayaa sheegay in aanay dareemeyn ammaan, islamarkaana ay ciidamada weli isku hor fadhiyaan aagagaasi, walow dhawaan heshiis nabadeed ay kala saxiixdeen madaxda labada maamul.
Kaltuun Yuusuf Ibraahim waxa ay ka mid tahay barakacayaashaasi, waxaana ay sheegtay Magaalada Gaalkacyo in aysan ku laaban doonin, cabsi ay ka qabaan in markale ay dagaalamaan labada dhinac.
