Xildhibaan C/risaaq Xasan Cismaan Jurile, oo ka mid ah xildhibaanada aqalka sare ee kasoo jeeda deegaanada Puntland ayaa ka hadlay doorashada guddoonka xildhibaanada aqalka sare.
Xildhibaanka ayaa sheegay in awood qeybsiga dalka uu dhigayo in xilka guddoonka aqalka sare ee baarlamaanka la siiyaa beelaha kasoo jeeda gobolada waqooyi ee dalka.
Xildhibaan Jurile ayaa beeniyay inuu jiro kulan magaalada Muqdisho ay ku yeesheen xildhibaanada beelaha Daarood, kaasi oo lagu go’aamiyay in isaga uu noqdaa musharaxa xilka guddoonka aqalka sare ee baarlamaanka.
Wuxuu sheegay in qoondada 4.5 oo doorashada ay ku saleysan tahay marka la eego in kursigaasi ay leeyihiin beelaha waqooyi ee dalka Soomaaliya.
Waxaa hadda socdo qabashada codsiyada musharixiinta dooneysa xilka guddoomiyaha xildhibaanada aqalka sare ee baarlamaanka, waxaana loo badinayaa musharixiinta inay kasoo jeedaan gobolada waqooyi.
Xildhibaanka ayaa ku baaqay in tartanka kursigaasi loo daayaa beelaha kasoo jeeda gobolada waqooyi ee dalka.
