Wararka laga helayo Gobolka Shabeelaha Hoose ayaa sheegaya in saacadihii la soo dhaafay uu weerar ku qaaday Shabeel dadka ku sugnaa degmada Wanlaweyn ee Gobolkaasi.
Ugu yaraan 7 qof oo ay ku jiraan Caruur ayuu dhaawacay Shabeelkaasi, sida u xaqiijiyay guddoomiye ku xigeenka dhinaca Maaliyadda ee maamulka gobolka Shabeelaha Hoose Cabdifitaax Xaaji Cabdulle.
Waxaana uu sheegay in dhaawacyada dadkaasi qaar kood ay yihiin kuwa halis ah, islamarkaana haatan lagu dabiibayo Isbitaal ku yaalla degamadaasi.
Sidoo kale guddoomiye ku xigeenka dhinaca Maaliyadda ee Gobolka Shabeelaha Hoose Cabdifitaax Xaaji Cabdulle ayaa tilmaamay in ciidamada ammaanka, gaar ahaan kuwa Booliska ay u gurmadeen dadkaasi, islamarkaana ay toogteen Shabeelka.
Waxaana uu sheegay in Shabeelku ahaa uhaa mid weyn oo uu dhiirir ahaan ku qiyaasay ku dhawaad 3 Mitir.
Dhacdadaan oo ah mid ugub ku ah Gobolka Shabeelaha Hoose ayaa waxaa aad uga argagaxay shacabka ku dhaqan Gobolkaasi, gaar ahaan kuwa ku nool deegaanada Miiga ah oo ay soo wajahday cabsi xoogan.
