Guddiga doorashada ee Baarlamaanka Maamulka Galmudug ayaa sheegay in ay wadaan qaban qaabadii ugu dambeysay oo ku aadan doorashada Madaxweyne ee Maamulkaas.
Guddoomiyaha Guddiga doorashada Galmudug Maryan Cali Abtidoon oo la hadashay Idaacadda Shabelle ayaa sheegtay in ay ka go’antahay in ay doortaan Madaxweyne majaraha u qabta Galmudug, xilli ay ka jawaabeysay war ka soo baxay Wasiir ka tirsan Maamulkaas oo tibaaxay in Xildhibaanada wada qaban qaabadaasi aysan tiro ahaan ka badneen illaa 10 Mudane.
Sidoo kale Xildhibaan Maryan Cali Abtidoon ayaa ka digtay in qal qal Siyaasadeed la galiyo Maamulka Galmudug, maadaama sida ay sheegtay ay Kalsoonidii kala laabteen Madaxweyne Axmed Ducaale Geelle Xaaf.
Hadalka Guddoomiyaha Guddiga Doorashada Galmudug ayaa ku soo beegmaya, xilli guddigaasi ay dib u dhigeen doorashada Madaxweyne ee Maamulkaas oo kol hore ay shaaciyeen, iyadoona la tilmaamay in la qaban doono 15-ka bisha soo socota ee November.
