Maalmo kadib markii Mareykanka uu Uganda ka saaray barnaamijka gargaarka dhaqaalaha sababo la xiriira xuquuqda aadanaha, ayaa madaxweynaha Uganda waxa uu si kulul u dhaliilay reer galbeedka.
Khudbad uu jeediyay Khamiistii, ayuu Madaxweyne Yoweri Museveni ku boorriyay sharci-dajiyayaasha dalalka Barwaaqo-sooranka inay diidaan waxa uu ku tilmaamay xumaanta dalalka reer galbeedka ee ku wajahan bulshooyinka iyaga ka duwan.
Museveni ayaa u sheegay madaxda baarlamaannada 33-ka waddan ee Barwaaqo-sooranka ee ku shirsan Kampala in dulmiga reer galbeedku uu ka kooban yahay gardaro, dhac, addoonsi, barakicin, isir sifayn, gumaysi iyo xukun dadban.
“Haddii aad rabto xorriyad, haddii aad qiimeyso xorriyadda, markaa waa inaad qiimeysaa xorriyadda qof walba,” ayuu yiri Museveni. “Haddii aad qiimeyso madax-bannaanida, haddii aad qadarinayso sharafta, markaa waa inaad ixtiraamtaa sharafta qof kasta, joojiya wax-ku-oolnimada iyo muxaadarooyinka bulshooyinka ka duwan kuwaaga.” ayuu raaciyay.
Museveni waxa uu ku eedeeyay “wadamada qaar” in ay isticmaalayaan horumarka tignoolajiyada, si ay u cadaadiyaan wadamada kale ee leh qiyamka ka duwan.
Tan iyo markii sharci-dajiyayaasha Uganda ay ansixiyeen sharciga ka hortagga dadka isku jinsiga ah ee isu galmooda bishii Maarso 2023, dalka ku yaalla Bariga Afrika ayaa waxaa saarnaa cadaadis ka dhan ah xadgudubyada xuquuqda aadanaha.
Bangiga Adduunka ayaa kala noqday dhaqaalihii uu siin jiray Uganda, iyada oo usbuucan oo kaliya ay lumisay fursadda inay ka faa’iidaysato Xeerka Kobaca iyo Fursadaha Afrikaanka ee Mareykanka ee AGOA.
